Sudanese Kitchen 2..الكسرة السودانية للمغتربين (بدون دقيق عيش) باكسرين

Habba Alagab.. قروب المطبخ السوداني 2 على فيس بوك.. الكسرة بابسط مكونات للمغتربين: الكسرة الكسرة علينا جاي😍😍😍 اول شي دي كسرة المغتربين الماعندهم دقيق عيش وبتتعمل بدقيق الرز والشوفان والدخن ودقيق عادي رقم 1 من كل نوع مكيال... ودقيق الذرة الاصفر الناعم وليس الخشن نص مكيال.. دقيق الذرة ده ما ليه علاقة بالنشا او الكورن فلاور نهائيا وهو دقيق يشبه السميد ولونه اصفر... (الدخن اختياري)... نعجن المكونات دي كلها بالموية ونضيف الخمار ونضربها بالخلاط كويس... الخطوة التانية نشيل مقدار كباية من العجين وننجضها في النار زي العصيدة وموضح في الفيديو ودي خطوة مهمة عشان بتحفظ ليك الكسرة فريش لاطول مدة ممكنة.. نخلي العجين يخمر لتاني يوم ولو كنتي مستعجلة ضيفي ملح ليمون للحموضة... اخيرا اختاري قوام وسط للعجين وممكن لو حسيتي محتاج دقيق ضيفي سوية عشان تمشي معاك الكسرة... اتمنى تستفيدوا من الفيديو وماتضحكوا على عواستي لاني لسة بتعلم😂 غايتو العواسات حينشلوا الليلة💔😂😂😂

الفئة