تسجيل صوتي مسرّب للقاء رئيس هيئة الأركان الأردني والأمير حمزة أبلغه بموجبه وضعه قيد الإقامة الجبرية باكسرين

تسجيل لمجريات اللقاء بين رئيس هيئة الأركان الأردني اللواء الحنيطي والأمير حمزة بن الحسين والذي أبلغه بموجبه وضعه قيد الإقامة الجبرية. النص الكامل للتسريب: حنيطي: "إنت كنت شايف سيدي في الأيام السابقة كان سمو الأمير يروح ويجي ويلتقي بالناس وبروح على مناسبات وكان يصير حكي على السوشيال ميديا ويصير حكي بالقعدات عن أداء الحكومة وعن أداء سيدنا ولي العهد(الأمير حسين بن عبد الله)" حمزة: "دقيقة إيش؟" حنيطي: "عن أداء سيدنا ولي العهد(الأمير حسين بن عبد الله)" حمزة: "حكي من قبلي أنا؟" حنيطي: "الناس اللي قاعدة سيدي" حمزة: "طيب؟" حنيطي: "فهذا الحكي سيدي أنا وياك عارفين.. يعني الناس بدأت تحكي أكثر من اللازم" حنيطي: "لذلك أرجو من سمو الأمير اعتباراً من هذا اليوم أنه يصير التزام من سمو الأمير بعدم الذهاب لهذه المناسبات وعدم الاختلاط (صوت غير مفهوم) بأجندات داخلية و خارجية والالتزام بالزيارات العائلية للعائلة الهاشمية فقط وإنه ما يصير أي تغريدات.." حمزة: "شباب جيبو السيارة بالله، جيبوا سيارة الباشا (رئيس الأركان) سيدي أرجوك، إنت في بيت الحسين" حمزة: "إنت بتدخل علي وبتقول لي شو أعمل!" حمزة: "ومع مين ألتقي منشان وطني، في بيتي!" حمزة: "إنت بتهددني يا سيدي؟" حنيطي: "أنا ما بهددك يا سيدي" حمزة: "شو الكلام هذا؟" حنيطي: "لا سيدي لا يمكن أهددك" حمزة: "بتقول لي ما أطلع أشوف الناس بتقولي ما اختلط؟!" حمزة: "سيدي أرجوك.. سيدي" حنيطي: "سمو الأمير.. سمو الأمير" حمزة: "سيدي اسمعني" حمزة: "سيدي" حنيطي: "أنا جاي أحكيلك إنه سيدنا (الملك عبد الله الثاني) ما بيعرف عن هذا الإشي" حنيطي: "إحنا الأجهزة الأمنية اللي منحكيلك سيدي" حمزة: "سيدنا (الملك عبد الله الثاني) ما بيعرف؟!" حمزة: "يعني إنتم الأجهزة الأمنية قاعدين تهددوني؟" حنيطي: "ما بنهددك" حمزة: "طيب شو اللي قاعدين تحكوه بالضبط؟" حنيطي: "لا يا سيدي إحنا بنحب.." حمزة: "سوء إدارة الدولة بسببي أنا؟!" حنيطي: "لا سيدي" حمزة: "الفشل اللي قاعد يصير بسببي أنا؟" حنيطي: "سمو الأمير" حمزة: "سيدي سامحني التخبيص اللي بصير بسببي أنا؟!" حنيطي: "سمو الأمير لو سمحت" حمزة: "لو سمحت يا سيدي انت جاي على بيتي بتقولي انت ومدراء الأجهزة بتهددوني؟!" حنيطي: "ما بنهددك" حمزة: "ما تطلع من بيتك بس تروح عند أهلك وما تغرد؟!" حنيطي: "سمو الأمير" حمزة: "سيدي إركب بسيارتك واطلع من الباب" حمزة: "اعذرني أنا بحترمك وبحترم المؤسسة تبعتك" حمزة: "ما بتحكيلي هذا الكلام في بيت الحسين" حمزة: "بتركب بسيارتك وبتطلع من البيت" حمزة: "سيدي.. سيدي أرجوك.. سيدي" حنيطي: "أرجوك.. أرجوك سمو الأمير لا ترفع صوتك ما لازم الناس.." حمزة: "شو اللي ما ترفع صوتك؟!" حمزة: "إنت بعرف الكلام اللي قاعد بتحكيلي إياه؟" حمزة: "سيدي إنت بتعرف الكلام اللي قاعد بتحكيلي إياه؟!" حنيطي: "أنا عارف شو اللي بحكيلك إياه" حمزة: "طيب بتركب سيارتك.." حنيطي: اللهم إني قد بلغت الرسالة. حمزة: "بلغت رسالة مين؟" حنيطي: "رسالتي أنا ورسالة مدير المخابرات العامة ورسالة مدير الأمن العام" حمزة: "إنه إيش؟" حنيطي: "إنه سيدي بتلتزم بما قلته لك" حمزة: "إيش؟ عيده بالله خلينا أسمعها مرة ثانية" حنيطي: "إنه سيدي هي الاختلاط والزيارات" حمزة: "إنه ما اختلط وما أزور الناس هدا الكلام اللي قاعد تحكي لي إياه؟" حنيطي: "والسوشيال ميديا وأي تغريدات" حمزة: "أي تغريدات؟ إيمتى آخر مرة أنا غردت" حنيطي: "والمعارضة الداخلية.. والمعارضة الداخلية (كلام غير مفهوم)" حمزة: "ايمتى آخر مرة أنا غردت.. إيمتى آخر تغريدة إلي" حنيطي: "سمو الأمير إنت مش شايف الفيسبوك" حمزة: "سيدي أنا أردني حر إبن أبوي (الملك الحسين الراحل) إلي الحق إني أختلط بأبناء شعبي ووطني وأخدم وطني مثل ما وعدت وأقسمت له وهو على سرير الموت" حمزة: "إنت جاي هسة إنت يا سيدي سامحني.. وين كنت قبل 20 سنة؟" حمزة: "أنا كنت ولي عهد.. ولي هدي البلد بأمر من والدي (الملك الحسين الراحل) الله يرحمه" حنيطي: "الله يرحمه" حمزة: "أنا أقسمت له (الملك الحسين الراحل) إنه أضل أخدم وطني وشعبي ما حييت" حمزة: "إنتم هسة بعد التخبيص اللي قاعد يصير اللي مش بسببي وما إلي علاقة فيه.. جايين تحكولي ألتزم؟!" حنيطي: "إحنا ما بنحكيلك سيدي لا تلتزم.." حنيطي: "سيدي لو سمحت" حمزة: "أرجوك يا سيدي كون واضح معي.. الرسالة من مين؟" حنيطي: "واضح رسالة منا إحنا مدراء الأجهزة الأمنية" حمزة: "من مدراء الأجهزة الأمنية وجايين علي يعني؟" حنيطي: "ما بنهددك، إحنا سيدي بنقلك إنك تعديت الخطوط الحمراء" حمزة: "أنا تعديت الخطوط الحمراء" حمزة: "طيب توكل على الله" حنيطي: "أشكرك" حنيطي: "السلام عليكم" حمزة: "سيدي اسمعني أرجوك أنا بحترمك كشخص" حمزة: "بس هذا التخبيص اللي قاعدين بتسووه في البلد راح يدمرنا كلنا" حنيطي: "ما راح يدمرنا" حمزة: "راح يدمرنا كلنا ويدمر إرث آبائي وأجدادي" حنيطي: "سيدي إنت.." حمزة: "سيدي إنت بتركب السيارة وبتضلك رايح" حنيطي: سيدي أرجوك خلي العائلة متحدة. حمزة: "سيدي العائلة.. الـ.. الـ.. التخبيص اللي قاعد يصير فيها مش مني أنا" حمزة: "إنت عارف من مين وأنا عارف من مين" حمزة: "فإذا سمحت يا سيدي توكل على الله" حنيطي: "شكراً سمو الأمير" حمزة: "والمرة الجاي ما بتيجي بتهددني ببيتي" حمزة: "هذا بيت الحسين يا سيدي" حنيطي: "أنا ما هددتك" حمزة: "شكرا الله يعطيك العافية.. سامحونا" #الأمير_حمزة #الأردن #اللواء_الحويطي ▼ موقع التلفزيون العربي ⟵ http://www.alaraby.com ▼ تابع التلفزيون العربي على مواقع التواصل الاجتماعي فيسبوك ⟵ https://www.facebook.com/AlarabyTelevision انستغرام ⟵ https://www.instagram.com/alarabytv تويتر ⟵ https://twitter.com/alarabytv

الفئة